پاکستان انٹرنیشنل ایئر لائنز (پی آئی اے) نے اپنے بوئنگ 777 طیاروں میں مسافروں کو بہتر اور جدید سہولیات فراہم کرنے کے لیے بڑا فیصلہ کر لیا ہے۔
LOADING...
پی آئی اے انتظامیہ نے بوئنگ 777 ساختہ طیاروں کی اکانومی اور بزنس کلاس کی تمام نشستیں تبدیل کرکے نئی جدید نشستیں لگانے کا منصوبہ بنایا ہے۔ اس کے علاوہ طیاروں میں ایک جدید ان فلائٹ انٹرٹینمنٹ سسٹم بھی نصب کیا جائے گا تاکہ مسافر دورانِ پرواز جدید اور آرام دہ سہولیات سے مستفید ہو سکیں۔
پی آئی اے نے اس حوالے سے بین الاقوامی سطح پر برطانیہ اور امریکا میں پروازوں کی بحالی کے پیش نظر بڈز طلب کر لیے ہیں۔ یہ اقدام مسافروں کو یورپ اور برطانیہ میں سفر کے دوران عالمی معیار کی سہولیات فراہم کرنے کے لیے کیا جا رہا ہے۔پی آئی اے انتظامیہ کا مقصد ہے کہ بوئنگ 777 طیارے مکمل طور پر جدید اور مسافروں کے لیے زیادہ آرام دہ بنائے جائیں تاکہ بین الاقوامی پروازوں میں مسافروں کا تجربہ بہتر ہو۔
