اولمپک مقابلوں میں کامیابی حاصل کرنے کے بعد ایشین ایتھلیٹکس چیمپیئن شپ میں بھی ارشد ندیم نے گولڈ میڈل اپنے نام کرکے پاکستان کا نام پوری دنیا میں روشن کر دیا۔
اولمپک چیمپئن ارشد ندیم نے ایشین ایتھلیٹکس چیمپئن شپ کے مینز جیولن فائنل میں ایک شاندار 86.40 میٹر کی تھرو کر کے میدان میں کامیابی حاصل کی، یہ مقابلہ جنوبی کوریا کے شہر گومی میں منعقد ہو رہا تھا۔بھارت کے سچن یادو نے 85.16 میٹر تھرو کے ساتھ چاندی کا تمغہ حاصل کیا، جب کہ جاپان کے یوٹا ساکی یاما نے 83.75 میٹر تھرو کے ساتھ کانسی کا تمغہ اپنے نام کیا۔چند ابتدائی تھرو میں سبقت حاصل کرنے کے بعد سری لنکا کے رومیش تھارنگا پاتھیرجے 83.27 میٹر تھرو کے ساتھ چوتھے نمبر پر آگئے، اور پوڈیم سے باہر ہو گئے۔
پاکستان کے یاسر سلطان نے 75.39 میٹر تھرو کے ساتھ آٹھویں پوزیشن حاصل کی، جب کہ بھارت کے یش ویر سنگھ ذاتی بہترین کارکردگی دکھاتے ہوئے 82.57 میٹر تھرو کے ساتھ ان سے آگے پانچویں نمبر پر رہے۔چین کے ہو ہاورن نے سیزن کی بہترین کارکردگی دکھاتے ہوئے 80.93 میٹر تھرو کے ساتھ چھٹی پوزیشن حاصل کی، جب کہ سری لنکا کے سومیڈھا جاگت رانا سنگھے مدیانسیلاگے نے 79.81 میٹر تھرو کے ساتھ ساتویں پوزیشن حاصل کی۔
فائنل کے بعد ’ڈان ڈاٹ کام‘ سے بات کرتے ہوئے ارشد ندیم کے کوچ سلمان بٹ نے کہا کہ یہ ایک اچھی کارکردگی تھی، خاص طور پر اس لیے کہ یہ اس سیزن کا ان کا پہلا مقابلہ تھا۔انہوں نے کہا کہ اگر گزشتہ روز کے ہیٹس اور فائنل کے درمیان ایک دن کا وقفہ ہوتا تو وہ بہتر ریکوری کر پاتے اور تھرو بھی بہتر ہو سکتا تھا، لیکن یہ اچھا آغاز ہے۔ارشد ندیم، جو پیرس 2024 میں 92.97 میٹر کی زبردست تھرو کے ساتھ اولمپک ریکارڈ کے حامل ہیں، ایشین چیمپئن شپ کا 86.72 میٹر کا ریکارڈ توڑنے سے بال بال رہ گئے۔
انہوں نے مقابلے کا آغاز قدرے سست انداز میں کیا، پہلی دو کوششوں میں 75.64 میٹر اور 76.80 میٹر تھرو کی، پھر تیسری کوشش میں 85.57 میٹر کی تھرو کے ساتھ سبقت حاصل کیاس کے بعد 83.99 اور 83.44 میٹر کی تھروز کیں، اور آخر میں چھٹی اور آخری کوشش میں 86.40 میٹر کی شاندار تھرو کر کے طلائی تمغہ جیتا۔جب ارشد ندیم پہلی بار میدان میں آئے تو سب کی نظریں ان پر تھیں، اور تماشائی پاکستانی جھنڈے لہرا رہے تھے۔
اسٹیڈیم میں ’دل دل پاکستان‘ گونج رہا تھا، اور شائقین جیولین سپر اسٹار کی بڑی تھرو کا شدت سے انتظار کر رہے تھے، جو گزشتہ سال کی پیرس اولمپکس کے بعد پہلی بار بین الاقوامی سطح پر مقابلہ کر رہے ہیں۔گزشتہ روز کے ہیٹس میں ندیم نے پہلی اور واحد کوشش میں شاندار 86.34 میٹر تھرو کر کے باآسانی فائنل کے لیے کوالیفائی کر لیا تھا، یاسر نے ہیٹس میں 76.07 میٹر کی تھرو کی تھی۔فائنل کے لیے کوالیفائی کرنے کے بعد ارشد ندیم نے انسٹاگرام پر لکھا کہ ہمیشہ کی طرح آپ کی دعاؤں اور سپورٹ کی ضرورت ہے۔
ندیم کا یہ طلائی تمغہ ایشین چیمپئن شپ میں پاکستان کا پہلا اور واحد تمغہ ہے۔اس سے قبل ہفتے کے آغاز میں پاکستان کی تیز ترین خاتون ایتھلیٹ تمیم خان نے خواتین کی 100 میٹر دوڑ کے ہیٹس میں 12.14 سیکنڈز کے ساتھ 17ویں پوزیشن حاصل کی۔ارشد ندیم جلد ہی ستمبر میں ہونے والی ورلڈ ایتھلیٹکس چیمپئن شپ کی تیاری کے لیے انگلینڈ روانہ ہوں گے۔
صدر، وزیراعظم اور دیگر کی مبارکباد
صدر مملکت آصف علی زرداری، وزیراعظم شہباز شریف، اسپیکر قومی اسمبلی سردار ایاز صادق، وزیراعلیٰ پنجاب مریم نواز، گورنر سندھ کامران ٹیسوری، گورنر خیبرپختونخوا فیصل کریم کنڈی، چئیرمین پاکستان کرکٹ بورڈ (پی سی بی) محسن نقوی سمیت دیگر رہنماؤں نے ارشد ندیم کو جنوبی کوریا میں ایشین ایتھلیٹکس چیمپیئن شپ جیتنے پر مبارکباد دیتے ہوئے کہا ہے کہ ارشد ندیم پاک دھرتی کا سپوت ہے، اور آج ارشد ندیم نے ایک بار پھر پاکستانیوں کا سر فخر سے بلند کر دیا۔
صدر آصف زرداری اور وزیراعظم شہباز شریف نے اپنے تہنیتی پیغامات میں کہا کہ ارشد ندیم نے جیولن تھرو کے کھیل میں ایک بار پھر پاکستان کا نام روشن کیا، ارشد ندیم نے فائنل سمیت پوری چیمپیئن شپ میں بہترین کھیل پیش کیا، ارشد ندیم کی اس شاندار جیت پر پوری قوم کو مبارکباد پیش کرتا ہوں، پوری قوم کو ارشد ندیم کی شاندار کارکردگی پر فخر ہے۔
دیگر رہنماؤں نے بھی اپنے بیانات میں نے کہا کہ ارشد ندیم پاکستان کا ہیرو ہے اور قوم اس کامیابی پر بہت خوش ہے، ارشد ندیم کی جیت سخت محنت، لگن اور کمٹمنٹ کا نتیجہ ہے۔سیاسی رہنماؤں نے کہا کہ تاریخی کامیابی پر ہر پاکستانی مسرور ہے، اور قوم کو پاکستان کے باصلاحیت بیٹے پر فخر ہے، بھارت سمیت دیگر ممالک کے ایتھلیٹس کو ہرا کر چیمپئن شپ جیت کر قومی پرچم کو بلند کرنا بہت بڑا اعزاز ہے۔
حوالہ
