صوابی کے علاقے گوہاٹی نہر میں رکشہ گرنے سے جاں بحق ہونے والے تمام افراد کی لاشیں نکالنے کا آپریشن مکمل کرلیا گیا۔ ریسکیو حکام کے مطابق آخری ڈوبنے والے بچے کی لاش نکالنے کے بعد سرچ آپریشن مکمل ہوا۔
LOADING...
یہ افسوسناک واقعہ اس وقت پیش آیا جب باکر کے مقام پر ایک تیز رفتار ٹریکٹر ٹرالی رکشہ سے ٹکرا گئی، جس کے نتیجے میں رکشہ نہر میں جا گرا۔ رکشے میں سوار افراد کا تعلق ایک ہی خاندان سے تھا، جن میں خواتین اور بچے شامل تھے۔واقعے میں مجموعی طور پر 14 افراد نہر میں ڈوب گئے، جن میں سے مقامی افراد اور ریسکیو کی غوطہ خور ٹیموں نے 8 افراد کو زندہ نکال لیا، جبکہ 6 افراد جاں بحق ہوئے۔
جاں بحق ہونے والوں میں تین خواتین، دو بچے اور ایک بچی شامل ہیں ریسکیو ٹیموں کی انتھک محنت اور مقامی افراد کے تعاون سے تمام لاشیں نکال لی گئیں، جس کے بعد ریسکیو آپریشن مکمل کر دیا گیا ہے۔ واقعے نے علاقے میں کہرام برپا کر دیا اور ہر آنکھ اشکبار ہے۔
