صدر مملکت آصف علی زرداری کے بعد وفاقی وزیر داخلہ محسن نقوی نے ا تنخواہ نہ لینے کا اعلان کردیا ۔ تفصیلات کےمطابق وزیر داخلہ محسن نقوی نے ٹویٹ کیا کہ میں اپنے دور میں وزارت سے تنخواہ وصول نہیں کرونگا۔ اس مشکل وقت میں ملک کی ہر ممکن خدمت کرنے کو تیار ہوں۔
جبکہ وفاقی وزیر برائے نجکاری عبدالعلیم خان نے بھی ماہانہ تنخواہ، سرکاری گاڑی و دیگر مراعات نہ لینے کا فیصلہ کیا ہے ،وفاقی وزیر عبدالعلیم خان اجلاسو ں و مہمانوں کی خاطر داری بھی اپنی جیب سےکریں گے ،عبدالعلیم خان کسی بھی وزارت سے کسی قسم کی سرکاری مراعات نہیں لیں گے۔اس سے قبل صدر مملکت آصف علی زرداری نے بطور صدر پاکستان اپنی تنخواہ نہ لینے کا فیصلہ کیا ہے ۔ایوانِ صدر کے پریس ونگ کی طرف سے جاری بیان کے مطابق صدر ِمملکت نے فیصلہ درپیش معاشی چیلنجز کے پیش ِنظر کیا۔
صدر آصف زرداری کے فیصلے کا مقصد ملک میں دانشمندانہ مالیاتی انتظام کی حوصلہ افزائی کرنا ہے۔ صدر مملکت نے قومی خزانے پر بوجھ نہ ڈالنے کا فیصلہ کرتے ہوئے تنخواہ نہ لینے کو ترجیح دی۔
