سعودی وزارت حج و عمرہ نے کہا ہے کہ کم عمر کے افراد عمرے کے لیے تنہا سعودی عرب آسکتے ہیں تاہم ان کی عمر 18 سال سے کم نہیں ہونی چاہیئے۔ سعودی عرب کے عکاظ اخبار کے مطابق وزارت حج و عمرہ کی جانب سے جاری بیان میں تمام عمرہ کمپنیوں اور اداروں سے کہا گیا ہے کہ نئے عمرہ سیزن کے دوران بیرون مملکت سے آنے والے زائرین کے حوالے سے مقرر کردہ قواعد و ضوابط کی پابندی جاری رکھنا ضروری ہے۔
وزارت نے کہا ہے کہ بیرون مملکت سے آنے والے عمرہ زائر کی عمر 18 سال سے کم نہیں ہونی چاہیئے، تمام عمرہ کمپنیاں اور ادارے بیرون ممالک سے آنے والے زائرین کے لیے عمرہ پیکیج کے دائرہ کار کے اندر مطلوبہ سہولیات فراہم کریں، عمرہ ویزے کے اجرا کے لیے اندرون مملکت ٹرانسپورٹ، انشورنس اور بنیادی خدمات کی بکنگ ضروری لازمی قرار دی گئی ہے۔وزارت کی جانب سے معلوم ہوا ہے کہ عمرہ پیکیج کا دورانیہ اندرون مملکت عمرہ زائرین کے قیام کی حقیقی مدت کے مطابق ہونا چاہیے۔
عمرہ ویزہ پر مملکت میں داخل ہونے کی تاریخ سے 90 روز تک قیام کیا جا سکتا ہے، عمرہ سیزن کے اختتام کے حوالے سے انتہائی حد 29 ذی قعدہ 1445ھ مقرر کی گئی ہے۔ معلوم ہوا ہے کہ سعودی وزارت حج و عمرہ نے عمرہ کے لیے الیکٹرانک ویزے کا اجراء شروع کر دیا ہے، اس کا مقصد زیادہ سے زیادہ مسلمانوں کو مملکت میں عمرہ کی ادائیگی کے لیے آنے کے قابل بنانے اور ان کے لیے اس کے طریقہ کار کو آسان بنانا ہے، یہ سعودی ویژن 2030 کے اہداف کے حصول کے لیے عمرہ خدمات کے معیار کو بڑھانے کے ساتھ ساتھ آتا ہے۔
عمرہ پر جانے کے خواہشمند پاکستانیوں کیلئے زبردست خبر
وزارت نے کہا کہ جو لوگ الیکٹرانک ویزے کے خواہاں ہیں وہ نسوک پلیٹ فارم پر درخواستیں جمع کراسکتے ہیں تاکہ وہ 19 جولائی سے مملکت میں پہنچنا شروع کر سکیں، نسک پلیٹ فارم دنیا بھر کے مسلمانوں کے لیے مکہ اور مدینہ کا دورہ کرنے کے لیے آمد کے طریقہ کار میں سہولت فراہم کرتا ہے، رہائش کے انتخاب اور نقل و حمل کی خدمات فراہم کرتا ہے، اس کے علاوہ معلومات کے پیکج اور متعدد زبانوں میں متعامل نقشوں تک آسان رسائی فراہم کرتا ہے۔
وزارت حج و عمرہ نے متعلقہ حکام کے تعاون سے پہلے اعلان کیا تھا کہ عرب ریاستوں کی خلیج تعاون کونسل کے سیاحتی ویزے کے حامل افراد اور شینگن ویزا کے حاملین نسک درخواست کے ذریعے عمرہ کی اپائنٹمنٹ بک کر سکتے ہیں، وزارت حج و عمرہ کی طرف سے عمرہ کرنے والوں کو فراہم کی جانے والی سہولیات نئی قانون سازی کا حصہ ہیں جسے حال ہی میں منظور کیا گیا ہے اور اس میں عمرہ کرنے والوں کی انشورنس فیس میں 63 فیصد کمی کرنا، ان کے لیے صحت کی خدمات کی پائیداری کو برقرار رکھنا، 24 گھنٹے سے کم وقت میں عمرہ ویزہ جاری کرنا شامل ہے۔
بتایا گیا ہے کہ عمرہ کے تازہ ترین طریقہ کار خواتین کو بغیر کسی مرد سرپرست (محرم) کے عمرہ کرنے کی اجازت دیتے ہیں، نئے قوانین عمرہ کرنے والوں کو مملکت کے ثقافتی تنوع کے بارے میں جاننے اور اپنے مذہبی اور ثقافتی تجربات سے مالا مال کرنے کے لیے مملکت کے منفرد مقامات کا دورہ کرنے کی بھی اجازت دیتے ہیں۔
