وفاقی حکومت نے مزید لوگوں کو ٹیکس نیٹ میں لانے کے لیے نان فائلرز کے کیش نکلوانے پر 0.6 فیصد ایڈوانس ٹیکس تجویز کیا ہے۔فنانس بل کے مطابق کیش نکلوانے پر نان فائلرز سے ایڈوانس ٹیکس لیا جائے گا۔کوئی بھی ایسا شخص جس کا نام ایکٹو ٹیکس دہندگان کی فہرست میں شامل نہ ہو، بینکنگ کمپنی ایک دن میں 50,000 روپے سے زیادہ کی رقم نکالنے پر اس میں سے 0.6 فیصد کی شرح پر ایڈوانس ایڈجسٹ ایبل ٹیکس کاٹے گی۔بل میں واضح کیا گیا ہے مذکورہ 50,000 روپے ایک ہی دن میں مجموعی طور پر نکالے جائیں تو ہی یہ شرط عائد ہوگی۔
یہ ایڈوانس ٹیکس اشفاق ٹولہ کی سربراہی میں ریفارم اینڈ ریونیو موبلائزیشن کمیشن (RRMC) کی سفارش پر لگایا گیا ہے۔آر آر ایم سی نے سفارش کی ہے کہ ٹیکس ریٹرن فائل نہ کرنے والوں کے لیے نقد رقم نکالنے، دیگر بینکنگ پروڈکٹس اور بینکنگ لین دین پر ودہولڈنگ ٹیکس کو بحال کیا جائے۔کیش نکالنے پر ود ہولڈنگ ٹیکس پہلی بار فنانس ایکٹ 2005 کے ذریعے متعارف کرایا گیا تھا اور 0.5 فیصد کی شرح سے 25,000 روپے یا اس سے زیادہ ٹیکس کا ہدف دیا گیا تھا۔
وفاقی بجٹ؛ سرکاری ملازمین کی تنخواہوں، الاؤنسز اور پنشن میں اضافے کا امکان
تاہم، بعد میں ہونے والی ترامیم نے حد کو بڑھا کر 50,000 روپے کر دیا اور انکم ٹیکس ریٹرن فائلرز کے لیے ود ہولڈنگ ٹیکس کی شرح کو 0.3 فیصد اور نان فائلرز کے لیے 0.6 فیصد تک بڑھا دیا۔2019 میں، ٹیکس فائلرز کے لیے ٹیکس ختم کر دیا گیا تھا، لیکن نان فائلرز اب بھی 50،000 روپے سے زیادہ یومیہ کیش نکالنے پر 0.6 فیصد ادا کر رہے تھے۔
تاہم، 2021 میں، نان فائلرز کے لیے بھی فنانس بل 2021 کے ذریعے نقد رقم نکالنے پر یہ ودہولڈنگ ٹیکس مکمل طور پر ختم کر دیا گیا تھا۔آر آر ایم سی کا خیال تھا کہ اس ٹیکس کی بحالی سے نہ صرف ٹیکس ریونیو پیدا کرنے میں بلکہ مزید لوگوں کو ٹیکس نیٹ میں لانے میں بھی مدد ملے گی۔فیڈرل بورڈ آف ریونیو (ایف بی آر) میں 7.6 ملین افراد کے رجسٹرڈ ہونے کے باوجود، صرف 3.6 ملین اصل میں ٹیکس گوشوارے جمع کراتے ہیں، جو رجسٹرڈ ٹیکس دہندگان کا 50 فیصد سے بھی کم ہیں۔
