یورپ کے مختلف علاقوں میں نایاب مکمل سورج گرہن کا شاندار منظر دیکھنے میں آیا جو مین لینڈ یورپ میں دو دہائیوں سے زائد عرصے بعد نظر آنے والا مکمل سورج گرہن ہےیورپی خلائی ایجنسی کے مطابق 12 اگست 2026 کا مکمل سورج گرہن گرین لینڈ، آئس لینڈ، شمالی اسپین اور پرتگال کے ایک محدود علاقے میں مکمل طور پر دیکھا گیا ۔
LOADING...
جبکہ یورپ کے بیشتر دیگر علاقوں میں جزوی سورج گرہن نظر آیا۔مکمل سورج گرہن کے دوران چاند سورج اور زمین کے درمیان آ گیا اور سورج کو مکمل طور پر ڈھانپ لیا جس کے باعث دن کے وقت مکمل گرہن والے علاقوں میں چند لمحوں کے لیے غیر معمولی تاریکی چھا گئی۔سورج کے مکمل طور پر چھپنے کے دوران اس کے گرد موجود بیرونی ماحول، یعنی سفید رنگ بھی نمایاں نظر آیا۔
شمالی اسپین مکمل گرہن دیکھنے کے لیے یورپ کا اہم ترین مرکز بن گیا، جہاں بڑی تعداد میں ماہرین فلکیات، فوٹوگرافرز اور شوقین افراد تاریخی فلکیاتی مظہر کا مشاہدہ کرنے کے لیے جمع ہوئے۔یورپی خلائی ایجنسی کے مطابق اسپین میں مکمل گرہن کی پٹی ملک کے ایک بڑے حصے سے گزری جبکہ مکمل تاریکی کا دورانیہ بعض مقامات پر تقریباً ایک منٹ 40 سیکنڈ تک رہا۔برطانیہ سمیت یورپ کے کئی دیگر ممالک میں مکمل کے بجائے جزوی سورج گرہن دیکھا گیا۔ برطانیہ میں گرہن سورج غروب ہونے سے قبل شام کے وقت نظر آیا جس کے باعث بعض علاقوں میں سورج کا بڑا حصہ چاند کے پیچھے چھپ گیا اور دن کی روشنی میں نمایاں کمی محسوس ہوئی۔
یورپی خلائی ایجنسی کے مطابق برطانیہ، آئرلینڈ، فرانس، بیلجیئم، نیدرلینڈز، ڈنمارک، ناروے، سویڈن اور دیگر یورپی ممالک میں جزوی گرہن دیکھا گیا۔گرہن کے مشاہدے کے لیے خصوصی سولر ایکلپس چشموں کی طلب میں بھی اضافہ دیکھا گیا۔ ماہرین نے خبردار کیا کہ سورج گرہن کو مناسب حفاظتی چشموں کے بغیر براہِ راست دیکھنا آنکھوں کو مستقل نقصان پہنچا سکتا ہے۔عام دھوپ کے چشمے، موبائل فون کے ذریعے براہِ راست سورج دیکھنا یا غیر معیاری چشمے بھی آنکھوں کے لیے محفوظ نہیں ہیں۔
فلک بینی کے شوقین افراد کے لیے سورج گرہن کے بعد ایک اور دلچسپ آسمانی مظہر بھی منتظر ہے۔ 12 اور 13 اگست کی رات سالانہ شہابیوں کی بارش پرسیڈز اپنے عروج پر پہنچ رہی ہے۔ناسا کے 2026 کے فلکیاتی اندازے کے مطابق پرسیڈز کی سرگرمی 13 اگست کو عروج پر ہوگی، جس دوران صاف اور تاریک آسمان میں متعدد روشن شہابِ ثاقب تیزی سے گزرتے دکھائی دے سکتے ہیں۔
ماہرین کے مطابق ایک ہی عرصے میں نایاب مکمل سورج گرہن اور پرسیڈ شہابیوں کی بارش کا عروج آسمان سے دلچسپی رکھنے والوں کے لیے غیر معمولی موقع ہے۔زمین پر مکمل سورج گرہن اوسطاً ہر 18 ماہ کے قریب کسی نہ کسی مقام پر رونما ہوتا ہے، تاہم ایک ہی مقام سے اس کا مشاہدہ انتہائی نایاب ہوتا ہے۔یورپی خلائی ایجنسی کے مطابق 12 اگست 2026 کا گرہن مین لینڈ یورپ میں 2006 کے بعد نظر آنے والا پہلا مکمل سورج گرہن ہے۔
