قومی ایئرلائن ( پی آئی اے) کا 5 سال بعد برطانیہ کیلئے فلائٹ آپریشن بحال ہوگیا اور اسلام آباد سے پہلی پرواز مسافروں کو لے کر مانچسٹر روانہ ہوگی۔تفصیلات کے مطابق قومی ایئرلائن (پی آئی اے) کی برطانیہ کے لیے براہ راست پروازیں پانچ سال بعد بحال ہو گئی ہیں۔اسلام آباد ایئرپورٹ پر برطانیہ کے لیے پی آئی اے کے فلائٹ آپریشن کی بحالی کی افتتاحی تقریب منعقد ہوئی، جس میں وفاقی وزیر دفاع و ہوا بازی خواجہ آصف، برطانوی ہائی کمشنر، سیکرٹری دفاع اور دیگر اعلیٰ حکام نے شرکت کی۔
LOADING...
افتتاح کے بعد پی آئی اے کی پہلی بوئنگ ٹرپل سیون پرواز PK-701 دو سو تہتر مسافروں کو لے کر دوپہر 12 بج کر 5 منٹ پر اسلام آباد سے مانچسٹر کے لیے روانہ ہوئی، یہ پرواز برطانوی وقت کے مطابق شام 5 بجے مانچسٹر پہنچے گی۔پی ائی اے کی پرواز کو وزیر دفاع خواجہ محمد آصف اور برطانوی ہائی کمشنر جین میریٹ نے الوداع کیاابتدائی مرحلے میں پی آئی اے کی مانچسٹر کے لیے ہفتہ وار دو پروازیں منگل اور ہفتے کے روز آپریٹ ہوں گی۔
واپسی پر مانچسٹر سے پرواز شام 7 بجے روانہ ہو کر اگلی صبح 7 بجے اسلام آباد پہنچے گی۔ترجمان پی آئی اے کے مطابق دوسرے مرحلے میں لندن کے لیے براہ راست پروازوں کا آغاز بھی کیا جائے گا۔واضح رہے کہ برطانیہ اور یورپ نے غلام سرور کے پائلٹ ڈگریوں سے متعلق بیان کے بعد 2020 میں پی آئی اے پر پابندی عائد کی تھی، جو پانچ سال بعد ختم کر دی گئی ہے۔
