ایپل صارفین کیلئے جلد ہی سستا ترین آئی فون متعارف کروانے جارہا ہے، اس حوالے سے کمپنی نے باضابطہ اعلان نہیں کیا، تاہم کمپنی کے چیف ایگزیکٹو نے ایپل صارفین کیلئے اس حوالے سے ایک پیغام جاری کیا ہے ۔ ایپل کے آئی فون ایس ای 4 کے متعلق گزشتہ کئی روز سے افواہیں گردش کررہی تھیں۔
LOADING...
حال ہی میں کمپنی کے چیف ایگزیکٹو ٹم کک نے ایکس (ٹوئٹر) پر ایک پوسٹ میں بتایا ہے کہ 'صارفین ہماری فیملی کے نئے رکن سے ملنے کے لیے تیار ہوجائیں' فیملی سے ان کی مراد ایپل کی تیار کردہ ڈیوائسز ہے، بظاہر تو انہوں نے یہ نہیں بتایا کہ کمپنی کی جانب سے کیا متعارف کرایا جا رہا ہے، مگر یہ ضرور بتایا کہ 19 فروری کو اس کا اعلان کیا جائے گا۔
قبل ازیں آنے والی رپورٹس میں بتایا گیا تھا کہ ایپل کی جانب سے فروری میں آئی فون ایس ای 4 متعارف کرایا جائے گا۔ اب کمپنی کے چیف ایگزیکٹو ٹم کک کے حالیہ بیان نے خالی جگہ پُر کردی ہے ، تو یہ واضح ہوچکا ہے کہ 19 فروری کو آئی فون ایس ای 4 پیش کیا جائے گا جس کے ساتھ ائیر ٹیگ 2 بھی متعارف کرایا جاسکتا ہے۔
آئی فون ایس ای 4 کا ڈیزائن اس سیریز کے دیگر فونز کے مقابلے میں زیادہ بہتر ہوگا، پہلی بار آئی فون ایس ای سیریز کے کسی فون میں ہوم بٹن کو ہٹا دیا جائے گا اور آئی فون 14 جیسے فل اسکرین ڈیزائن کو اپنایا جائے گا۔ فیس آئی ڈی کے لیے فرنٹ کیمرے کو نوچ ڈیزائن میں چھپایا جائے گا، آئی فون ایس ای 4 میں 6.1 انچ کا او ایل ای ڈی ڈسپلے دیا جائے گا۔
فون کے اندر اے 18 چپ موجود ہوگی جو ایپل کی جانب سے گزشتہ سال کے آئی فون 16 اور 16 پلس میں استعمال کی گئی۔ آئی فون ایس ای 4 میں بیک پر 48 میگا پکسل کیمرا دیے جانے کا امکان ہے، اسی طرح فرنٹ پر 24 میگا پکسل کیمرا موجود ہوگا۔ایپل نے پہلا آئی فون ایس ای 2016 میں متعارف کرایا تھا اور اس موقع پر کہا تھا کہ یہ ایک ایسا سستا آئی فون ہے جس میں مہنگے ماڈلز جیسے فیچرز موجود ہیں۔
