بھارت میں بے رحم والدین نے آئی فون خریدنے کے لیے اپنے 8 ماہ کے بیٹے کو فروخت کر دیا۔بھارتی میڈیا رپورٹس کے مطابق مغربی بنگال کے ضلع پرگناس میں میاں بیوی نے انسٹاگرام ریلز بنانے آئی فون خریدنے کے لیے اپنے 8 ماہ کے بیٹے کو بیچ دیا۔پولیس کے مطابق یہ واقعہ ہفتہ کو اس وقت سامنے آیاجب پڑوسیوں نے جوڑے کے پاس آئی فون دیکھا۔ پڑوسیوں کو شک ہوا کیونکہ خاندان کا بمشکل ہی گزارہ ہوتا تھا اور ایسے میں انہوں نے آئی فون لے لیا۔
پڑوسیوں نے جوڑے سے ان کے بچے کے بارے میں پوچھا جس پر انہیں بتایا گیا کہ شیر خوار بیٹا ایک رشتہ دار کے پاس ہے تاہم مقامی لوگوں کو شک ہوا اور انہوں نے کونسلر کو اطلاع دی، جنہوں نے فوری طور پر پولیس کو بلایا۔بھارتی میڈیا کے مطابق پولیس نے جب والدین سے تفتیش کی تو انہوں نے اعتراف کیا کہ ہم نے بچے کو بیچ دیا اور انسٹاگرام ریلز بنانے کے لیے اس رقم سے آئی فون خریدا۔والدین نے بچے کو قریبی علاقے میں ایک عورت کو بیچا تھا۔
اعتراف جرم کرنے کے بعد پولیس نے جوڑے کو گرفتار کر لیا۔بچے کے والد نے ہفتے کی رات اپنی 7 سالہ بیٹی کو بھی بیچنے کی کوشش کی تھی۔دوسری جانب پولیس نے مغربی بنگال کے علاقے کھردہا میں خاتون سے شیر خوار بچے کو بازیاب کرا لیا۔پولیس کے مطابق اس بات کی تحقیقات کی جارہی ہے کہ آیا اس کیس میں بچوں کی اسمگلنگ کا کوئی گروہ تو ملوث نہیں، اس حوالے سے مزید تفتیش جاری ہے۔
