سندھ اسمبلی کے سابق سپیکر آغا سراج درانی انتقال کر گئے۔ تفصیلات کے مطابق پاکستان پیپلزپارٹی کے سینئر رہنما اور سندھ اسمبلی کے سابق سپیکر آغا سراج درانی طویل علالت کے بعد آج بتاریخ 15 اکتوبر 2025ء بروز بدھ کراچی میں انتقال کرگئے، وہ کافی عرصے سے عارضۂ قلب اور دیگر بیماریوں میں مبتلا تھے اور ان کا علاج کراچی کے ایک نجی ہسپتال میں جاری تھا لیکن وہ جانبر نہ ہوسکے اور خالق حقیقی سے جاملے، مرحوم نے سوگواران میں اہلیہ ناہید درانی، ایک بیٹا آغا شہباز اور 3 بیٹیاں صنم، سارہ اور شہانہ درانی چھوڑے ہیں۔
LOADING...
بتایا گیا ہے کہ محمد آغا سراج خان درانی 5 اکتوبر 1953ء کو پیدا ہوئے، وہ پاکستان پیپلز پارٹی سے وابستہ تھے اور اپنے سیاسی کیریئر کے دوران کئی اہم عہدوں پر فائز رہے، انہوں نے 2013ء سے 2024ء تک سندھ اسمبلی کے سپیکر کی حیثیت سے خدمات انجام دیں، اس کے علاوہ آغا سراج درانی متعدد بار سندھ اسمبلی کے رکن بھی منتخب ہوئے، وہ سندھ کے نگراں گورنر کے عہدے پر بھی فائز رہے۔
بتایا جارہا ہے کہ آغا سراج درانی کا شمار پاکستان پیپلز پارٹی کے اہم ترین رہنماؤں میں ہوتا تھا اور ان کے انتقال سے سندھ کی سیاست میں ایک خلا پیدا ہوا ہے، صدر آصف علی زرداری نے ان کے انتقال پر گہرے دکھ اور اہلِ خانہ سے دلی ہمدردی و تعزیت کا اظہار کیا، صدر مملکت نے آغا سراج درانی کی سیاسی خدمات کو سراہا، مرحوم کی سیاسی و عوامی خدمات کو خراجِ تحسین پیش کیا، انہوں نے کہا کہ آغا سراج درانی نے جمہوری اقدار کے فروغ میں نمایاں کردار ادا کیا، الّلہ تعالیٰ مرحوم کو جوارِ رحمت میں جگہ عطا فرمائے۔
