اسلام آباد، راولپنڈی اور دیگر علاقوں میں رات گئے موسلادھار بارش، رین ایمرجنسی نافذ

اسلام آباد اور راولپنڈی میں رات گئے موسلادھار بارش کے بعد رین ایمرجنسی نافذ کر دی گئی ہے۔ انتظامیہ نے کسی بھی ہنگامی صورتحال سے نمٹنے کے لیے متعلقہ اداروں کو الرٹ کر دیا ہے، جبکہ نالہ لئی سمیت تمام ندی نالوں کی مسلسل نگرانی کی جا رہی ہے۔

LOADING...

ایم ڈی واسا کے مطابق نالہ لئی میں کٹاریاں کے مقام پر پانی کی سطح 8 فٹ اور گوالمنڈی پر 7 فٹ تک بلند ہو چکی ہے۔ جڑواں شہروں میں مجموعی طور پر 80 ملی میٹر سے زائد بارش ریکارڈ کی گئی ہے۔ سب سے زیادہ بارش سیدپور میں 90 ملی میٹر ہوئی، شمس آباد میں 80 ملی میٹر اور کٹاریاں میں 55 ملی میٹر بارش ریکارڈ کی گئی۔

دوسری جانب آزاد کشمیر میں شدید بارش کے بعد ندی نالوں میں طغیانی آ گئی ہے۔ پشاور، صوابی، مردان، وادی کاغان، بالاکوٹ اور بٹ خیلہ میں بھی وقفے وقفے سے بارش کا سلسلہ جاری ہے۔ لاہور کے مختلف علاقوں میں بھی رات گئے ہلکی بارش ہوئی جس سے موسم خوشگوار ہو گیا۔

محکمہ موسمیات کے مطابق آج بلوچستان، پنجاب، خیبرپختونخوا، کشمیر اور گلگت بلتستان میں بارش کی پیش گوئی کی گئی ہے، جبکہ سندھ کے ساحلی علاقوں میں مطلع جزوی طور پر ابرآلود رہنے اور بعض مقامات پر ہلکی بارش کا امکان ہے۔انتظامیہ نے شہریوں سے اپیل کی ہے کہ وہ ندی نالوں کے قریب جانے سے گریز کریں اور کسی بھی ہنگامی صورتحال میں فوری طور پر ریسکیو اداروں سے رابطہ کریں۔

حوالہ