ابتدا میں اونٹنی کو عارضی طور پر ایک مصنوعی ٹانگ فراہم کیے جانے کی اطلاع سامنے آئی تھی۔تاہم آج اس این جی او کی پوسٹ کردہ ویڈیو میں اونٹنی کو اپنی نئی مصنوعی ٹانگ پر کھڑے ہوئے دیکھا جاسکتا ہے۔اس ویڈیو کے ساتھ دیے گئے کیپشن میں بتایا گیا کہ 'آج سے ایک سال پہلے، کیمی پر بے رحمی سے حملہ کر کے اس کا اگلا پاؤں کاٹ دیا گیا اور اسے مرنے کے لیے چھوڑ دیا گیا۔ لیکن آج۔۔ اس نے پہلی بار اپنے مصنوعی پاؤں پر کھڑے ہو کر سب کو حیران کر دیا'۔ این جی او کا کہنا تھا کہ 'یہ ایک ایسا سال تھا جس میں آنسو، مشکلات، علاج، تکلیف اور خاموش ہمت شامل تھی، ایسا وقت بھی آیا جب ہمیں کہا گیا کہ ہار مان لو، آگے بڑھ جاؤ، وقت ضائع نہ کرو۔
لیکن ہم نے کیمی کا ساتھ نہیں چھوڑا۔۔۔اور آج، کیمی ہمارے لیے کھڑی ہوگئی، الحمدللہ، یہ لمحہ کسی معجزے سے کم نہیں۔اس کے ساتھ انہوں نے جانوروں کے لیے مصنوعی اعضا بنانے والے امریکی ادارے @bionicpets ، حکومت سندھ اور رہنما پیپلز پارٹی شازیہ مری کا بھی شکریہ ادا کیا۔کیپشن میں کہا گیا کہ ابھی کیمی کو اپنے نئے پاؤں کے ساتھ جینے کی عادت ڈالنی ہے، راستہ لمبا ہے۔۔۔لیکن آج کا دن خوشی کا ہے، امید کا ہے۔۔ اور اُن خاموش جیتوں کا جشن ہے جو اُس وقت ہوتی ہیں جب ہم ہار نہیں مانتے۔
