پنجاب حکومت نے 12 اپریل کو لاہور میں عام تعطیل کا اعلان کردیا۔ تفصیلات کے مطابق پنجاب حکومت کی جانب سے صوفی بزرگ حضرت شاہ حسین کے عرس کی مناسبت سے سالانہ تہوار میلہ چراغاں کے موقع پر 12 اپریل کو عام تعطیل کا اعلان کیا گیا ہے۔
LOADING...
اس حوالے سے محکمہ سروسز اینڈ جنرل ایڈمنسٹریشن (ویلفیئر ونگ) کی جانب سے جاری کردہ نوٹی فکیشن میں کہا گیا ہے کہ تعطیل صرف لاہور ضلع میں لاگو ہوگی اور تمام ذیلی دفاتر بھی اس میں شامل ہیں، تاہم پنجاب سول سیکرٹریٹ، اس سے منسلک محکمے اور علاقائی دفاتر تعطیل سے مستثنیٰ ہوں گے۔
بتایا جارہا ہے کہ میلہ چراغاں کو روشنیوں کا تہوار بھی کہا جاتا ہے جو لاہور کی سب سے اہم ثقافتی اور روحانی تقریبات میں سے ایک ہے، میلہ چراغاں دراصل پنجابی صوفی شاعر شاہ حسین کے عرس کی تین روزہ تقاریب کا نام ہے، یہ تقریب لاہور کے تاریخی شالامار باغ کے قریب ان کے مزار پر منعقد ہوتی ہے جہاں ہزاروں زائرین شرکت کرتے ہیں۔
یہ تقاریب پہلے شالامار باغ کے اندر منعقد ہوا کرتی تھیں مگر صدر ایوب خان کے صدارتی حکم 1958ء کے بعد سے شالامار باغ میں ان تقاریب کے انعقاد پر پابندی عائد کر دی گئی۔معلوم ہوا ہے کہ ماضی قریب تک یہ میلہ لاہور کی تاریخ کا سب سے بڑا کلچرل فیسٹول ہوا کرتا تھا، تاہم اب بسنت پر پابندی کے باعٹ یہ پھر بڑی تقریبات میں شمار ہوتا ہے۔
اگرچہ اسے مشہور صوفی حضرت مادھو لال حسین کی یادگار سمجھا جاتا ہے لیکن دراصل یہ ایک موسمی میلہ تھا، اتفاق سے ایک دفعہ مادھو لال حسین کا عرس ان ہی تاریخوں میں آگیا جو میلے کے لیے مخصوص تھیں اور یہ دونوں اکھٹے منائے گئے۔بتایا گیا ہے کہ میلے کے موقع پر جو گیت گائے جاتے ہیں ۔
ان میں ’’بولیاں ‘‘ خصوصی حیثیت کی حامل ہوتی ہیں، ہر سال حضرت شاہ حسین کے مزار پر منعقد ہونے والے اس میلے میں پورے خطے سے بڑی تعداد میں لوگ آتے ہیں اور اس میں صوفی موسیقی، شاعری اور پنجابی بزرگ کے احترام میں روایتی رسومات منعقد ہوتی ہیں۔
