امریکا میں ایک اور طیارہ حادثے سے بال بال بچ گیا۔ ہیوسٹن سے نیویارک جانے والی یونائیٹڈ ایئرلائنز کی پرواز کو اس کے انجن میں آگ لگنے کے بعد ہنگامی طور پر خالی کروا لیا گیا۔ طیارے میں 100 سے زائد مسافر سوار تھے، تاہم تمام افراد محفوظ رہے۔فلائٹ 1382 اتوار کی صبح 8:30 بجے کے بعد جارج بش انٹرکانٹی نینٹل ایئرپورٹ سے لاگارڈیا ایئرپورٹ روانہ ہونے والی تھی کہ عملے کو ایک انجن میں خرابی کا اشارہ ملا، جس پر پائلٹ نے فوری طور پر پرواز منسوخ کر دی۔
LOADING...
فیڈرل ایوی ایشن اتھارٹی کے مطابق، انجن میں خرابی کی اطلاع ملنے پر ٹیک آف کو محفوظ طریقے سے روک دیا گیا، اور مسافروں کو رن وے پر ہی اتار کر بسوں کے ذریعے ٹرمینل منتقل کیا گیا۔نیویارک ٹائمز کے مطابق، تمام 104 مسافر ایمرجنسی سلائیڈز اور سیڑھیوں کے ذریعے بحفاظت باہر نکلے اور کسی کے زخمی ہونے کی اطلاع نہیں ملی۔
سوشل میڈیا پر گردش کرنے والی ایک ویڈیو میں ایئربس A319 طیارے کے ایک انجن سے آگ اور دھواں نکلتا دکھائی دے رہا ہے۔ ایک مسافر نے دوران پرواز انجن سے نکلتی ہوئی آگ کی ویڈیو بنائی، جس میں کسی کو یہ کہتے ہوئے سنا جا سکتا ہے، ”پلیز ہمیں یہاں سے نکالو“۔
یہ واقعہ ایسے وقت میں پیش آیا ہے جب حالیہ دنوں میں امریکہ میں فضائی حادثات میں اضافہ دیکھنے میں آیا ہے۔چند روز قبل، امریکن ایئرلائنز کا ایک طیارہ ریگن نیشنل ایئرپورٹ کے قریب امریکی فوج کے بلیک ہاک ہیلی کاپٹر سے ٹکرا گیا تھا، جس کے نتیجے میں دونوں طیارے پوٹومیک دریا میں گر گئے۔ حکام کے مطابق، حادثے میں 67 افراد ہلاک ہوئے۔جمعہ کی رات فلاڈیلفیا میں ایک اور طیارہ ایک شاپنگ مال کے قریب گر کر تباہ ہو گیا، جس میں 7 افراد ہلاک اور 19 زخمی ہو گئے تھے۔
