پاکستان کرکٹ بورڈ (پی سی بی) کی جانب سے تعلیمی اداروں میں کرکٹ کو فروغ دینے اور انفراسٹرکچر کو بہتر بنانے کے لیے ٹورنامنٹس اور لیگز کرانے کا فیصلہ کیا گیا ہے۔پی سی بی انٹر بورڈز کوآرڈینیشن کمیشن، ہائیر ایجوکیشن کمیشن اور سی ڈی اے کے ساتھ گزشتہ روز معاہدے پر دستخط کیے گئے۔ سی ڈی اے ہیڈ کوارٹر میں مفاہمت کی یادداشتوں پر دستخط کی خصوصی تقریب میں چیئرمین پی سی بی محسن نقوی اور وفاقی وزیر تعلیم خالد مقبول صدیقی نے بھی شرکت کی۔
LOADING...
اس موقع پر چیئرمین پی سی بی کا کہنا تھا کہ کرکٹ کے نچلی سطح پر فروغ کے لیے تاریخ میں پہلی بار سنجیدہ کاوش کی گئی ہے۔ انٹر اسکولز، انٹر کالجیٹ، انٹر یونیورسٹیز ٹورنامنٹس کے انعقاد سے نچلی سطح سے ٹیلنٹ سامنے آئے گا۔محسن نقوی نے کہا کہ تمام ادارے ایک ساتھ مل کر ٹورنامنٹ کرائیں گے تو بہترین نتائج حاصل ہوں گے۔ امید ہے کہ ان معاہدوں پر عمل درآمد سے گراس روٹ لیول پر کرکٹ مضبوط ہوگی۔
اس حوالے سے آئی بی سی سی اور تعلیمی بورڈز صوبائی اور وفاقی حکومتوں کے ساتھ مل کر سکولوں اور کالجوں میں کرکٹ گراؤنڈز تیار کریں گے۔ ٹورنامنٹس کا آغاز ضلع کی سطح سے شروع ہو گا پھر ڈویژن ۔صوبائی، اور آخر میں قومی سطح پر ٹورنامنٹس کا انعقاد کیا جائے گا۔پی سی بی اعلی تعلیمی اداروں کے گراؤنڈ مین اور کیوریٹرز کو مفت تربیت دے گا۔ پی سی بی ٹورنامنٹس کے انعقاد کو یقینی بنانے کے لیے آفیشل ایمپائرز، اسکوررز اور دیگر ضروری اسٹاف فراہم کرے گا۔
